जिल्ला समन्वय समिति बाँकेको प्रमुखमा चौधरी र उपप्रमुखमा कार्की निर्वाचित घोषित

पिपलबाेट संवाददाता


जिल्ला समन्वय समितिको प्रमुखमा नेपाली कांग्रेसका ज्ञानेन्द्रकुमार चौधरी निर्वाचित भएका छन । शुक्रबार सम्पन्न भएको मतदानमा कुल खसेको १६ मत मध्ये १३ मत प्राप्त गरि निर्वाचित भएका हुन । निकटतम प्रतिद्वन्दी जनता समाजवादी पार्टी(जसपा)का उमेशकुमार कुर्मीले ३ मत प्राप्त गरे ।  उप-प्रमुख पदमा भने नेपाली कांग्रेसकी नेतृ सीता कार्कीको एकल उम्मेदवारी परेकाले यसअघि नै निर्वाचित भइसकेकी थिइन ।
यस्तै समन्वय समितिको सदस्य (महिला) पदमा नेकपा (माओवादी केन्द्र)की चमेली थरुनी र रेवती दमाई पनि १३/१३ मत प्राप्त गर्दै निर्वाचित भए । यसैगरी जसपाकी तरन्नुन बानो शेषले ३ मत प्राप्त गरेर निर्वाचित भएको मुख्य निर्वाचन अधिकृत खडानन्द तिवारीले जानकारी दिए । निकटतम प्रतिद्वन्दी जसपाकी लक्ष्मी पासीले २ मत प्राप्त गरि पराजित भइन । महिला सदस्यमा ३ जना निर्वाचित हुने ब्यवस्था छ ।
समन्वय समितिको सदस्य (खुल्ला) मा भने नेपाली कांग्रेसका उदयनारायण मिश्र, जुलफकार अली मनिहार र सन्तकुमार थारु तथा दलित वा अल्पसंख्यक सदस्यमा जगदिश बाल्मिकी पनि यसअघि नै निर्विरोध निर्वाचित भएका थिए ।
बाँकेमा कुल ८ वटा स्थानीय तह रहेका छन् । यि मध्ये नेपाली कांग्रेसले कोहलपुर नगरपालिका तथा राप्ती सोनारी, डुडुवा, जानकी र बैजनाथ गाउँपालिकामा प्रमुख र उपप्रमुख दुबै पद जितेको छ । यस्तै नेपालगन्जमा कांग्रेसले प्रमुख र जसपाले उपप्रमुख जितेको छ ।
खजुरा गाउँपालिकामा प्रमुखमा माओवादी केन्द्र तथा उपप्रमुखमा कांग्रेसले जितेको छ, भने नरैनापुर गाउँपालिकामा अध्यक्ष र उपाध्यक्ष दुबै पद जसपाले जितेको छ । समन्वय समितिको निर्वाचनमा स्थानीय तहका प्रमुख र उपप्रमुखले मतदान गर्ने ब्यवस्था छ । उक्त निर्वाचनका लागि कुल १६ जना मतदाता थिए । यि मध्ये १२ जना मतदाता नेपाली कांग्रेसका थिए ।

२७ जेष्ठ २०७९ मा प्रकाशित
Nabintech