सशस्त्र प्रहरीद्वारा अबैध सुर्तीजन्य सामग्री बरामद

पिपलबाेट संवाददाता


सशस्त्र प्रहरी बल नेपाल नम्बर ३० गण बागेश्वरी बाँकेको गस्ती टोलीले शुक्रबार बिहान भारतबाट अवैध रुपमा नेपालगन्जमा भित्रीएको ठुलो परिमाणको सुर्तीजन्य सामाग्री बरामद गरेको छ ।

सशस्त्र प्रहरी नायब निरीक्षक पोषण बस्नेतको कमान्डको टोलीले नेपालगन्ज उपमहानगरपालिका वडा नम्बर २३ को भज्जीपुर्वा भन्ने स्थानबाट आज बिहान ३ बजे सुर्तीजन्य सामाग्रीसहित एउटा भारतीय नम्बर प्लेटको मोटरसाइकल बरामद गरेको हो । मोटरसाइकल बरामद गरिएपनी चालकले मोटरसाइकल छोडेर भागेको नायब निरीक्षक बस्नेतले बताए ।

बरामद गरिएका सुर्तीजन्य सामाग्रीमा सुपरपावर सुर्ती ५२५ पोका, कमलापसन्द ५० डिब्बा, तस्करीमा प्रयोग भएको एउटा भारतीय नम्बर प्लेटको पल्सर मोटरसाइकल रहेको सशस्त्र प्रहरीले जानकारी दिएको छ।

बरामदी मोटरसाइकलसहित सुर्तीजन्य सामाग्रीको मूल्य १ लाख ५८ हजार १२५ रुपैयाँ बराबरको रहेको सशस्त्र प्रहरी बल नम्बर ३० गणले जानकारी दिएको छ ।

कोरोना भाइरस महामारी समयको लकडाउनमा सशस्त्र प्रहरी बाँकेले करिब १६ लाख बराबरको अवैध सामाग्री बरामद गरिसकेको छ । बरामद गरिएका सामाग्रीलाई भन्सार कार्यालय बुझाइएको सशस्त्र प्रहरीले जानकारी दिएको छ ।

२६ असार २०७७ मा प्रकाशित
Nabintech