अपांगता कोटाबाट कांग्रेस केन्द्रिय सदस्यमा युवा नेता खत्री आकांक्षी

पिपलबाेट संवाददाता


नेपाली कांग्रेसको १४ औं महाधिवेशन नजिकिदै गर्दा पार्टीका नेताहरुले धमाधम आफ्नो उम्मेदवारी घोषणा गरिरहेका छन् । कतिपयले पार्टीको गुटभित्र आफ्नो उम्मेदवारी सुनिश्चित गर्न नेताका घरदैलो धाइरहेका छन् ।

यसैक्रममा महाधिवेशनका लागि बाँकेबाट पनि केन्द्रिय सदस्यका लागि थुप्रै आकांक्षी थपिदै गएका छन् । केन्द्रिय सदस्यका लागि बाँकेका लुटबहादुर खत्री पनि आकांक्षी देखिएका छन् । बाँके क्षेत्र नम्बर १ का महाधिवेशन प्रतिनिधी रहेका उनी संस्थापन (देउवा) पक्षबाट अपांगता कोटामा केन्द्रिय सदस्य पदमा आकांक्षी देखिएका हुन् ।

नेपाल बिद्यार्थी संघ, नेपाल तरुण दल हुदै पार्टीको राजनीतिमा लागेका उनलाई यसअघि कांग्रेसले लुम्बिनी प्रदेशबाट राष्ट्रिय सभा सदस्यको उम्मेदवार पनि बनाएको थियो । आफु संस्थापन पक्षबाट अपांगता कोटाबाट केन्द्रिय सदस्यका लागि आकांक्षी रहेको युवा नेता खत्रीले बताए ।

‘म नेपाली कांग्रेसको १४ औं महाधिवेशनमा संस्थापन पक्षबाट अपांगता कोटामा केन्द्रिय सदस्यको आकांक्षी हुँ,’ उनले भने ‘चुनावको तयारीका लागि म काठमाडौं पुगिसकेको छु, नेताहरुले मलाई उम्मेदवार बनाउनु हुनेछ भन्नेमा म विश्वस्त छु ।’ पुर्वगृहमन्त्री स्वर्गिय खुमबहादुर खड्का निकट रहेका नेता खत्री हाल संस्थापन पक्षमा छन् ।

पार्टी सभापति एवम् प्रधानमन्त्री शेरबहादुर देउवा, गृहमन्त्री बालकृष्ण खाण, पार्टीका महामन्त्री पुर्णबहादुर खड्का, केन्द्रिय सदस्य किशोरसिंह राठौर, पुष्पा भुसाल, मोहनबहादुर बस्नेत, नेता देवेन्द्रराज कँडेल लगायत नेताको साथ रहेको खत्री बताउँछन् । ‘संस्थापन पक्षबाट टिकट पाएमा म भारी मतले चुनाव जित्छु,’ उनले भने ‘किनकी म तरुण दलका देशभरका साथीहरुसँग नजिक छु ।’

बाँकेबाटै अन्य ५ जना नेता पनि केन्द्रिय सदस्यका आकांक्षी छन् । संस्थापन पक्षबाट ४ र संस्थापन इतर पक्षबाट एक जनाले केन्द्रिय सदस्यमा आकांक्षा देखाएका हुन् । संस्थापन इतर पक्षबाट बाँके कांग्रेस सभापति किरण कोइराला आकांक्षी छिन् ।

यस्तै संस्थापन पक्षबाट पुर्वमन्त्री एवम् कांग्रेस बाँकेका पुर्वसभापति गजेन्द्र हमाल, पुर्वसभासदद्धय आशा बिक र मैकुलाल बाल्मिकी तथा दलित संघका केन्द्रिय उपाध्यक्ष कृष्ण बिक रसाइली आकांक्षी छन् ।

२१ मंसिर २०७८ मा प्रकाशित
Nabintech